Naibu Katibu Mkuu Ofisi ya Makamu wa Rais Bw. Abdallah Hassan Mitawi akifungua kikao cha wadau kuhusu kubadilishana uzoefu wa udhibiti na usimamizi wa taka za plastiki nchini, kilichofanyika Dodoma Januari 30,2025.
Mkurugenzi wa Mazingira Ofisi ya Makamu wa Rais Bi. Kemilembe Mutasa akizungumza katika kikao cha wadau kuhusu kubadilishana uzoefu wa udhibiti na usimamizi wa taka za plastiki nchini, kilichofanyika Dodoma Januari 30,2025 ambapo amesema katika kukabiliana na udhibiti wa taka hususani taka za plastiki, Serikali kupitia Ofisi ya Makamu wa Rais imechukua hatua mbalimbali katika kuimarisha usimamizi wa taka nchini ikiwemo Kutunga na kufanya marekebisho ya Sera, Sheria, Kanuni, Mikakati na Miongozo mbalimbali.
Naibu Katibu Mkuu Ofisi ya Makamu wa Rais Bw. Abdallah Hassan Mitawi (katikati waliokaa) akiwa katika picha ya pamoja na wadau mbalimbali wa mazingira baada ya kufungua kikao cha wadau kuhusu kubadilishana uzoefu wa udhibiti na usimamizi wa taka za plastiki nchini, kilichofanyika Dodoma Januari 30,2025.
……
Ofisi ya Makamu wa Rais imeandaa Mkakati wa Usimamizi wa Taka wa mwaka 2025-2030 ambao unalenga kuimarisha miundombinu ya usimamizi wa taka katika maeneo yote nchini.
Hayo yamesemwa na Naibu Katibu Mkuu (Muungano) Ofisi ya Makamu wa Rais Bw. Abdallah Hassan Mitawi katika kikao cha wadau kuhusu kubadilishana uzoefu wa udhibiti na usimamizi wa taka za plastiki nchini, kilichofanyika Dodoma Januari 30,2025.
Amesema inakadiriwa kuwa Tanzania inazalisha taka ngumu kati ya tani milioni 14.4 hadi 20.7 kwa mwaka ambazo ni sawa na wastani wa kilo 241 hadi 347 kwa mtu mmoja kwa mwaka. Aidha, maeneo ya mijini yanakadiriwa kuwa na uzalishaji mkubwa zaidi wa taka ikilinganishwa na maeneo ya vijijini.
“Takwimu za maeneo yenye uzalishaji mkubwa wa taka ngumu nchini zinaonesha wastani wa mabaki ya bustani, mbao, na vyakula ni asilimia 63.4; mchanganyiko wa taka za kielektroniki, vifaa vya nyumbani, majivu, na taka zisizo na kemikali ni asilimia 12.8; taka za plastiki ni asilimia 12; taka za karatasi ni asilimia 6.1; taka za vioo ni asilimia 4.2 na taka za metali ni asilimia 1.5.
Bw. Mitawi ameongeza asilimia 70 ya taka ngumu zinazozalishwa nchini zinaweza kurejelezwa. Hata hivyo, ni asilimia 5 hadi 10 pekee ya taka hizi hurejelezwa ambapo kiwango kikubwa cha urejelezaji kinatokana na taka za plastiki, karatasi, chuma chakavu, aluminium, glasi, taka za kielektroniki, betri za asidi ya risasi, na mafuta yaliyotumika au taka za mafuta.
Amesema kiwango cha asilimia 5 hadi 10 cha urejelezaji kimechangiwa na utekelezaji wa mwongozo wa dhana ya 3Rs (punguza, tumia tena, na rejeleza taka) hususani katika sekta binafsi. Mathalani, Kampuni nane za vinywaji zimeungana kukuza usimamizi endelevu wa taka kupitia Wajibu wa Wazalishaji Kudhibiti Taka zitokanazo na bidhaa wanazozalisha kwa uratibu wa Shirika la Urejelezaji wa Taka za Plastiki (PETRO).
Hata hivyo, amesema ushirikiano huu unalenga kukusanya na kurejeleza tani milioni 12.5 za taka za plastiki nchini kote kwa mwaka. Kiwango kikubwa cha taka zinazozalishwa hutupwa ovyo, ispokuwa katika Halmashauri saba zenye madampo ya kisasa.
Kwa upande wake, Mkurugenzi wa Mazingira Ofisi ya Makamu wa Rais Bi. Kemilembe Mutasa amesema katika kukabiliana na udhibiti wa taka hususani taka za plastiki, Serikali kupitia Ofisi ya Makamu wa Rais imechukua hatua mbalimbali katika kuimarisha usimamizi wa taka nchini ikiwemo kutunga na kufanya marekebisho ya Sera, Sheria, Kanuni, Mikakati na Miongozo mbalimbali.
Pia, amesema Serikali imeendelea kutoa elimu kwa umma kupitia vipindi vya redio, television, warsha na mikutano mbalimbali na kuandaa mradi wa mfano wa urejelezaji wa taka za plastiki uliopo jijini Dodoma.
Naye Mkurugenzi wa HUDEFO Bi. Sarah Pima amesema taasisi hiyo imekuwa ikishirikiana na Serikali katika kuhamasisha Uhifadhi wa Mazingira hasa katika mikoa ambayo imekuwa ikizalisha taka za plastiki kama vile Dar es Salaam.
Ameongeza pia wamekuwa wakitoa elimu kwa makundi mbalimbali kama vile waandishi wa Habari ambao kupitia vyombo vya Habari elimu imekuwa ikiwafikia watu wengi kwa wakati mmoja.
