MASHINDANO YA JAMUKAYA RAMADHAN CUP 2025 YAZINDULIWA RASMI

Chapa Jambo Group na Meneja Mkuu wa Jambo Media, Nickson George akizungumza huku ameshikilia kikombe kinachoashiria uzinduzi rasmi wa Mashindano ya Jamukaya Ramadhan Cup 2025.

Na Marco Maduhu & Kadama Malunde – SHINYANGA

MASHINDANO ya Jamukaya Ramadhan Cup 2025, yamezinduliwa rasmi na Kampuni ya Jambo Group na yanatarajiwa kufanyika mwanzoni mwa mwezi Machi mwaka huu, katika kipindi cha Mfungo wa Mwezi Mtukufu wa Ramadhani.

Michuano hiyo inayojivunia kuunganishwa na tamaduni za kidini, itaendelea kuhamasisha umoja na mshikamano katika jamii, ikiwa na kauli mbiu ya mwaka huu: “Jamukaya Ramadhan Cup, hii ni Ibada, tuungane na tushiriki kwa pamoja.”

Uzinduzi huo umefanywa na Msimamizi wa Chapa Jambo Group na Meneja Mkuu wa Jambo Media, Nickson George, ambaye amezungumza na waandishi wa habari leo, Januari 31, 2025.

Mashindano yameboreshwa zaidi kwa Mwaka 2025!

Akizungumza wakati wa uzinduzi, George amesema kuwa mashindano ya mwaka huu yatafanyika usiku kuanzia saa 4 katika uwanja wa Chuo cha Ualimu Shinyanga (Shycom), na yatatoa fursa ya kipekee kwa jamii kuungana na kufurahi pamoja wakati wa mfungo wa Mwezi Mtukufu wa Ramadhani.

“Kutakuwa na timu 20 za mpira wa miguu zinazoshiriki, ikijumuisha timu 16 kutoka mwaka 2024, huku zawadi kwa mshindi wa kwanza ikiwa imeongezeka kutoka shilingi milioni 1 hadi shilingi milioni 5,” amesema George.

Kwa mujibu wa George, timu zinakaribishwa kujiandikisha kuanzia leo, huku kiingilio cha timu kikiwa sh. 300,000/= kwa timu za kawaida na sh. 500,000/= kwa timu za mashirika.

Kwa wananchi, viingilio vimepangwa kuwa sh. 1,000/=, na kila mtazamaji atapata kinywaji cha Jambo mlangoni.

Fursa za Kiuchumi na Umoja wa Jamii

Amesema mashindano haya hayataishia tu uwanjani, bali pia yataleta fursa kubwa kwa wajasiriamali wa Shinyanga.

Msimamizi wa Chapa Jambo Group na Meneja Mkuu wa Jambo Media, Nickson George akizindua Mashindano ya Jamukaya Ramadhan Cup 2025

“Wajasiriamali wataweza kufanya biashara zao kwa kiingilio kidogo cha sh. 1,000, ambapo wataweza kuuza bidhaa mbalimbali kwa umma unaohudhuria mashindano,” ameongeza George.

Amefafanua kuwa, Jamukaya Ramadhan Cup pia inalenga kukuza afya na ustawi wa kijamii katika kipindi cha Mwezi Mtukufu wa Ramadhani, ambapo michezo itakuwa njia ya kuimarisha umoja na mshikamano katika jamii.

“Katika kipindi hiki cha mfungo wa Mwezi Mtukufu wa Ramadhani, wachezaji na mashabiki wataweza kupata nafasi ya kuburudika na kuungana kupitia michezo, huku wakijikita katika ibada na kumtumikia Mwenyezi Mungu,” amesema George.

Taa Angavu, Ulinzi na Usalama Upo!

Mwenyekiti wa Kamati ya Mashindano hayo, Jerry Julius, amesisitiza kuwa kamati imejipanga vyema kuhakikisha mashindano haya yanaendeshwa kwa ufanisi.

 “Mapungufu ya mwaka 2024 tumeyafanyia kazi na tumeboresha miundombinu, ikiwa ni pamoja na kuweka taa angavu zaidi uwanjani.

 Ulinzi na usalama pia umekumbukwa, na tutahakikisha kwamba mashabiki wanashuhudia michuano hii kwa furaha na usalama,” amesema Julius.

Amesema kwa wale wanaotaka kushiriki, fomu za usajili za timu zipo Ofisi za Jambo FM (Ibadakuli – Shinyanga Mjini), au zinaweza kupatikana kwa kumpigia simu kwa namba 0629289448.

Viongozi wa Michezo Wapongeza Jamukaya Ramadhan Cup

Katibu Mkuu wa Chama Cha Mpira wa Miguu Wilaya ya Shinyanga (SHIDIFA), Budete Njile, amepongeza Kampuni ya Jambo Group kwa kuandaa mashindano haya, akisema kuwa ni hatua nzuri ya kukuza vipaji vya vijana.

“Tunashirikiana na kampuni hii kuleta maendeleo na kukuza michezo katika jamii yetu, na tunatoa wito kwa wachezaji na mashabiki wote kujitokeza kwa wingi,” amesema Njile.

Naye mchezaji maarufu Emmanuel Daudi Momoro kutoka Timu ya Kitangili FC, ameelezea furaha yake kuhusu mashindano haya na kuahidi kwamba timu yake iko tayari kutwaa ubingwa mwaka huu.