Waziri Mkuu, Kassim Majaliwa akimsikiliza, Joshua Kingu mwanachuo kutoka Chuo cha VETA Kipawa jijini Dar es salaam, fani ya Mekatroniki alipotoa maelezo kuhusu mfano wa kiwanda unaotumika kufundishia, alipotembelea banda la maonesho la Chuo hicho kabla ya kufungua Kilele cha Maadhimisho ya Miaka 50 ya Utoaji wa Elimu ya Mafunzo ya Ufundi Stadi nchini na Miaka 30 ya VETA. Kwenye Kituo cha Mikutano cha Julius Nyerere jijini Dar es salaam, Machi 18, 2025.
(Picha na Ofisi ya Waziri Mkuu)
WAZIRI MKUU Kassim Majaliwa ametoa wito kwa wadau wa elimu na mafunzo ya ufundi stadi nchini watoe mafunzo yanayozingatia mahitaji halisi ya soko la ajira.
“Mahitaji ya soko la ajira tutayajua kwa kufanya tafiti za mara kwa mara kwa ushirikiano kati ya Serikali, sekta binafsi, na mashirika ya kimataifa.”
Ametoa wito huo leo (Jumanne, Machi 18, 2025) katika Maadhimisho ya miaka 30 ya Uanzishwaji wa Mamlaka ya Elimu na Mafunzo ya Ufundi Stadi (VETA) yaliyofanyika katika Kituo cha Kimataifa cha Mikutano cha Julius Nyerere, Dar es Salaam.
Amesema katika zama hizi zenye kasi ya maendeleo ya teknolojia, ni muhimu kwa VETA kuendelea kujiimarisha kukabiliana na mabadiliko ya teknolojia duniani.
“Toeni mafunzo ya ufundi stadi yanayoendana na mabadiliko ya teknolojia, mafunzo hayo yajumuishe ujuzi wa teknolojia za kisasa zinazochochea uzalishaji wenye tija.”
Akizungumza kuhusu umuhimu wa Elimu ya Ufundi Stadi, Mheshimiwa Majaliwa amesema kuwa takwimu za Shirika la Kazi Duniani (ILO) zinaonesha kuwa takribani asilimia 70 ya ajira zote ni ajira binafsi na kwa watu wenye elimu ya ufundi stadi hasa kwenye sekta za kilimo, ujenzi, usafirishaji, na huduma za kijamii.
“Kwa upande wa nchi yetu, takwimu za ajira zilizozalishwa kati ya mwaka 2020 na 2024 zinafikia Milioni 7 ambapo ajira binafsi katika sekta isiyo rasmi imeajiri watu milioni 6.1 sawa na asilimia 87.1 ambapo wengi wao wana elimu ya ufundi stadi, na sekta rasmi imeajiri watu 907,873 (asilimia 12.9) ambapo wengi wao ni wale wenye elimu ya juu”.
Pia, Waziri Mkuu ameiagiza Wizara ya Elimu, Sayansi na Teknolojia kwa kushirikiana na Ofisi ya Rais – TAMISEMI na Wizara ya Viwanda na Biashara wahakikishe ujenzi wa vyuo 65 vya ufundi unakamilika haraka.
Waziri Mkuu amesema ukamilishwaji wa vyuo hivyo vinavyojengwa na Serikali unalenga kutimiza dhamira ya Mheshimiwa Rais Dkt. Samia Suluhu Hassan ya kuwawezesha Watanzania kiujuzi.
“Ujenzi wa vyuo hivi ukikamilika, VETA itakuwa na vyuo 145 katika ngazi ya Mikoa yote 26 na Wilaya zote nchini. Vilevile, katika vyuo 80 vilivyopo, vyuo 30 vilikamilishwa katika kipindi cha Serikali ya Awamu ya Sita (6). Tuna kila sababu ya kumpongeza Rais wetu kwa kazi kubwa anayowafanyia Watanzania.”
Kadhalika Waziri Mkuu ameitaka VETA ihakikishe inatangaza fursa za mafunzo zilizopo ili vijana haswa wa vijijini waweze kuzitumia. “Inawezekana kabisa kuwa, wapo vijana katika maeneo mbalimbali nchini haswa ya vijijini ambao hawana taarifa ya fursa za mafunzo zilizopo.”
Kwa upande wake, Mkurugenzi Mkuu wa VETA, CPA Anthony Kasore amesema taasisi hiyo imejizatiti katika kuboresha mafunzo na kwamba wataendelea kutoa ujuzi ili kuhakikisha Taifa linakuwa na watu wenye ujuzi.
Pia, CPA Kasore ametumia fursa hiyo kuishukuru Serikali kwa kuwekeza katika eneo la kutoa ujuzi eneo ambalo litawawezesha Watanzania wengi kujikwamua kiuchumi.
Waziri Mkuu, Kassim Majaliwa akisalimiana na viongozi alipowasili kwenye Kituo cha Mikutano cha Kikataifa cha Julius Nyerere jijini Dar es salaam kufungua Kilele cha Maadhimisho ya Miaka 50 ya Utoaji wa Elimu ya Mafunzo ya Ufundi Stadi nchini na Miaka 30 ya VETA, Machi 18, 2025. Kutoka kushoto ni Waziri wa Elimu, Syansi na Teknolojia, Profesa Adolf Mkenda, waziri wa Viwanda na Biashara, Selemani Jafo, Naibu Waziri wa Mambo ya Nje na Ushirikiano wa Afrika ya Mashariki, Dennis Londo, na kulia ni Naibu Waziri wa Elimu, Sayansi na Teknolojia, Omari Kipanga. (Picha na Ofisi ya Waziri Mkuu)
Waziri Mkuu, Kasim Majaliwa akiongozwa na Waziri wa Elimu, Sayansi na Teknolojia, Profesa Adolf Mkenda kuingia ukumbi wa mikutano wa Kituo cha Mikutano cha Kikataifa cha Julius Nyerere jijini Dar es salaam kufungua Kilele cha Maadhimisho ya Miaka 50 ya Utoaji wa Elimu ya Mafunzo ya Udundi Stadi inchini na Miaka 30 ya VETA, Machi 18, 2025. (Picha na Ofisi ya Waziri Mkuu)
Waziri Mkuu, Kassim Majaliwa akimsikiliza, Joshua Kingu mwanachuo kutoka Chuo cha VETA Kipawa jijini Dar es salaam, fani ya Mekatroniki alipotoa maelezo kuhusu mfano wa kiwanda unaotumika kufundishia, alipotembelea banda la maonesho la Chuo hicho kabla ya kufungua Kilele cha Maadhimisho ya Miaka 50 ya Utoaji wa Elimu ya Mafunzo ya Ufundi Stadi nchini na Miaka 30 ya VETA. Kwenye Kituo cha Mikutano cha Julius Nyerere jijini Dar es salaam, Machi 18, 2025. (Picha na Ofisi ya Waziri Mkuu)
Waziri Mkuu, Kassim Majaliwa akipata maelezo kutoka kwa Abdallah Mohammed , Mkurugenzi wa Vyuo na Mafunzo, Mamlaka ya Mafunzo ya Amali Zanzibar kuhusu hotipoti iliyotengenezwa kwa kutumia mti alipotembelea banda la manesco la mamalaka hiyo kabla ya kufungua Kilele cha Maadhimisho ya Miaka 50 ya Utoaji wa Elimu ya Mafunzo ya Ufundi Stadi nchini na Miaka 30 ya VETA. Kwenye Kituo cha Mikutano cha Julius Nyerere jijini Dar es salaam, Machi 18, 2025. (Picha na Ofisi ya Waziri Mkuu)
Waziri Mkuu, Kassim Majaliwa akipata maelezo kutoka kwa Mkurugenzi wa kampuni ya Fay Fashion Tanzania, Gregory (kushoto) kuhusu bidha mbalimbali zinazotengenezwa na kampuni hiyo alipotembelea banda la maonesho la kampuni hiyo kabla ya kufungua Kilele cha Maadhimisho ya Miaka 50 ya Utoaji wa Elimu ya Mafunzo ya Ufundi Stadi inchini na Miaka 30 ya VETA. Kwenye Kituo cha Mikutano cha Julius Nyerere jijini Dar es salaam, Machi 18, 2025. (Picha na Ofisi ya Waziri Mkuu)
Waziri Mkuu, Kassim Majaliwa akiingia kwenye ukumbi wa mikutano wa Kituo cha Mikutano cha Kimataifa cha Julius Nyerere jijini Dar es salaam kufungua Kilele cha Maadhimisho ya Miaka 50 ya Utoaji wa Elimu ya Mafunzo ya Ufundi Stadi nchini na Miaka 30 ya VETA, Machi 18, 2025. (Picha na Ofisi ya Waziri Mkuu)
Waziri Mkuu, Kassim Majaliwa akizungumza alipomwakilisha Rais Dkt. Samia Suluhu Hassan katika ufunguzi wa Kilele cha Maadhimisho ya Miaka 50 ya Utoaji wa Elimu ya Mafunzo ya Ufundi Stadi nchini na Miaka 30 ya VETA, kwenye Kituo cha Mikutano cha Kimataifa cha Julius Nyerere jijini Dar es salaam, Machi 18, 2025. (Picha na Ofisi ya Waziri Mkuu).
