Meneja Uhusiano wa Jamii na Miradi wa Barrick Buzwagi, Stanley Joseph, akionyesha Maofisa kutoka manispaa ya Kahama sehemu za mgodi zilivyoboreshwa kwa ajili ya uwekezaji walipofanya ziara mgodini hapo
Timu ya wataalamu wa idara mbalimbali kutoka manispaa ya Kahama mkoani Shinyanga wamefanya ziara ya kikazi katika mgodi wa dhahabu wa Barrick Buzwagi uliopo katika mchakato wa kufungwa na kupongeza hatua nzuri iliyofikia ikiwemo kutengwa sehemu ya uwekezaji la kongani ya Buzwagi (Buzwagi Special Economic Zone) ambayo itakuwa kitovu cha ukuzaji biashara katika mikoa ya kanda ya ziwa na nchi jirani.
Ujumbe huo wa wataalamu umefanya ziara ya kukagua utekelezaji wa mradi huu ambao unafuatia kufungwa kwa Mgodi na kuanza maandalizi ya uanzishwaji wa mradi mpya wa Buzwagi Special Economic Zone mradi unaotajwa kuja kutoa fursa zaidi kwa wawekezaji wa viwanda, wafanyabiashara na ofisi kubwa zaidi za kikanda na kimataifa jambo ambalo litawezesha utoaji wa huduma kwa Wilaya ya Kahama, Mkoa wa Shinyanga, Mikoa jirani pamoja na Nchi za Burundi, Rwanda na maeneo mengine ukizingatia kuwa Kahama ni Lango la Kibiashara.
Akiongea baada ya kuhitimisha ziara hiyo Mkurugenzi Mtendaji wa Halmashauri ya Manispaa ya Kahama, Masudi Kibetu ambaye ameongoza ujumbe huo amesema wameridhishwa kwa jinsi mchakato wa kufunga mgodi huo unavyoendelea vizuri na ameipongeza Kampuni ya Barrick kwa kuendesha zoezi hilo kitaalamu huku ikizingatia usimamizi wa mazingira, hasa kuhusu maji na utunzaji wa uoto wa mimea.
“Eneo hili la Kongani ya Buzwagi na maeneo mengine yaliyotengwa kwa ajili ya kufanya uwekezaji ni moja ya fursa ambayo itafungua milango ya ukuaji biashara na kukuza uchumi wa mkoa wa Shinyanga,natoa wito kwa wawekezaji kuchangamkia fursa kwa ajili ya kujenga viwanda ambavyo vitawezesha wananchi wengi kupata ajira”, amesema Kibetu.
Akieleza jinsi utekelezaji wa Eneo hilo unavyoendelea Meneja Uhusiano wa Jamii na Miradi wa Buzwagi, Stanley Joseph, amesema kuwa tayari baadhi ya wawekezaji wameonyesha nia ya kuwekeza katika eneo hilo huku Baadhi yao tayari wakiwa wameshaanza uzalishaji na wengine wakiendelea na ujenzi wa Miundombinu.
Ameeleza kuwa kongani ya Buzwagi ikikamilika itakuwa kongani ya pili nchini mbali na Benjamin Mkapa Export Zone iliyopo Jijini Dar es Salaam hivyo itafanikisha kuleta fursa kubwa si kwa Wilaya ya kahama na Shinyanga pekee bali nchi nzima .
Chuo cha Barrick Buzwagi kilifunguliwa mwaka 2024 katika eneo hilo na kimefanya maendeleo makubwa katika kukuza vipaji vya Barrick.
Kikiwa kimejikita katika utoaji mafunzo kwa mafomeni, wasimamizi na warakibu, chuo hicho tayari kimetoa mafunzo kwa watu wapatao 1,700 na kinatarajiwa kuvuka lengo lake la kutoa mafunzo kwa zaidi ya watu 2,800 ifikapo mwishoni mwa mwaka 2025.
