Na WMJJWM, Songwe
Serikali kwa kushirikiana na wadau imeanzisha vikundi 3,963 vya malezi chanya kwa lengo la kutumika kutoa elimu ya malezi chanya kwa jamii katika kukabiliana na changamoto za malezi nchini.
Hayo yamebainishwa mkoani Songwe na Mkurugenzi Msaidizi Idara ya Maendeleo ya Mtoto kutoka Wizara ya Maendeleo ya Jamii, Jinsia, Wanawake na Makundi Maalum Asha Shame wakati akifungua mafunzo ya wajibu wa wazazi na walezi katika malezi na matunzo ya familia kwa Maafisa Maendeleo ya Jamii, Maafisa Ustawi wa Jamii na Maafisa Elimu kutoka Ofisi ya Mkoa wa Songwe, Halmashauri za Ileje, Mbozi na Tunduma kwa lengo la kuwawezesha maafisa hao kutoa elimu hiyo kwa jamii Agosti 19, 2024.
Asha amesema Serikali imeendelea kutumia majukwaa tofauti yakiwemo ya viongozi wa dini na waandishi wa habari katika kutoa elimu ya wajibu wa wazazi na walezi katika malezi ya watoto na familia.
“Jumla ya viongozi wa dini 109 kutoka katika madhehebu ya Kikiristo na Kiislamu (TEC, CCT, BAKWATA, CPCT na SDA) ambapo jumla ya waumini 35,520 wameweza kufikiwa na elimu hii. Jitihada nyingine ni kuanzishwa kwa vituo vya kulelea Watoto mchana vya kijamii ambapo tayari vituo 255 vimeshaanzishwa.” amesema Mkurugenzi Asha.
Ameongeza kupitia tafiti iliyofanyika mwaka 2015 ilibainika kuwa wazazi wengi hasa wa kiume wamekuwa hawawajibiki katika malezi ya watoto na kupelekea jukumu hilo kubebwa na wazazi wa kike katika maeneo yote ya mjini na vijijini.
Aidha, amesema elimu ya malezi kwa wazazi ilionekana kikwazo katika suala la malezi makuzi na maendeleo ya mtoto ikiwemo lishe bora, afya, malezi yenye mwitikio, fursa za ujifunzaji na ulinzi na usalama wa mtoto.
Kupitia mafunzo hayo washiriki wanategemewa kutoka na mbinu mbalimbali zitakazowawezesha kuzifikia jamii kuanzia ngazi ya kaya pamoja na wadau muhimu katika malezi ya watoto, kupata elimu ya mnyororo chanya wa malezi ya watoto kuanzia kipindi cha utungaji wa mimba mpaka vijana balehe na kuandaliwa kwa mpango kazi wa Mkoa wa Songwe kuhusu utekelezaji wa Mwongozo wa Wajibu wa Wazazi na Walezi katika malezi na Matunzo ya Familia.
Naye Mkurugenzi wa Shirika la Tanzania Interfaith Patership (TIP) Asina Shenduli akitoa salaam za Shirika hilo amesema kwa kushirikiana na Wizara ya Maendeleo ya Jamii, Jinsia, Wanawake na Makundi Maalum pamoja na shirika la UNICEF wameahidi kushirikiana na Serikali katika kuhakikisha elimu ya malezi chanya kwa watoto na familia inatolewa kwa jamii, hususan katika ngazi za chini.
Kwa upande wake Afisa Maendeleo ya Jamii mkoa wa Songwe Menrad Dimoso akizungumza kwa niaba ya Katibu Tawala wa Mkoa amesema Ofisi ya Mko wa Songwe itaendelea kusimamia utekelezaji wa mafunzo kwa maafisa hao ili jamii waweze kupata elimu hiyo ili kusadiaia wazazi na walezi kujua wajibu wao katika malezi na magtunzo ya familia kwa ustawi wa jamii na taifa.
Wizara ya Maendeleo ya Jamii, Jinsia, Wanawake na Makundi Maalum kwa kushirikiana na Shirika la Tanzania Interfaith Patership (TIP) NA UNICEF wanaendesha mafunzo kwa Maafisa wa Serikali kwa kada za Elimu, Ustawi wa Jamii na Maendeleo ya Jamii katika Halmashauri mbalimbali kwa lengo la kutoa elimu ya wajibu wa mzazi na mlezi katika malezi na matunzo ya familia.
