Na Renatha Msungu Mbeya
RAIS Samia Suluhu Hassan ameweka jiwe la msingi kwenye mradi wa ujenzi wa kituo cha pamoja cha forodha Kasumulu wilayani Kyela katika mpaka wa Tanzania na Malawi .
Jiwe hilo la msingi limewekwa Agosti 7, 2022 na Rais Samia katika mradi huo unaojengwa na Kampuni ya China Geo-Engineering Corporation (CGC) na kusimamiwa na Wakala wa Majengo Tanzania (TBA) kwa kushirikiana na Kampuni ya Engineering Consultant Group (ECG) kutoka Misri.
Akizungumza na wananchi wakati wa uwekaji wa jiwe hilo la msingi,Rais Samia amewaasa wananchi kuulinda na kuutunza mradi huo ili uwe endelevu kwa maslahi mapana ya wananchi na Taifa kwa ujumla.
Ametoa pongezi kwa waliojenga mradi huo huku akisema ni matumaini yake kwamba atarudi kwa ajili ya kuuzindua ili uanze kuhudumia wananchi .
“Ombi langu ,naomba wananchi muulinde, mradi huu ni wenu ,naomba mtoe ushirikiano ,ulindeni pamoja na miundombinu yake ili ukae kwa kipindi kirefu na uweze kuchangia maendeleo ya Taifa letu.”amesisitiza Rais Samia
