Na Mwandishi Wetu,Dodoma
KMAPUNI ya Oryx Gas Tanzania imesema inajivunia kutangaza rasmi udhamini wake wa kambi ya Skauti Tanzania, ikiwa ni sehemu ya dhamira yake ya kuendeleza vijana, kulinda mazingira, na kuhamasisha matumizi ya nishati safi ya kupikia nchini sambamba na kutoa mitungi ya gesi 260 makubwa na madogo kwa Chama hicho.
Akizungumza leo Septemba 3,2025 katika kambi ya mafunzo ya Skauti Tanzania iliyohusisha vijana skauti kutoka mikoa yote nchini Meneja Mauzo Tanzania Bara Alex Wambi amesema kuwa hiyo ni hatua muhimu katika safari ya kuelekea matumizi ya nishati safi na kuwawezesha vijana.
Ameongeza pia wanajivunia kutangaza mchango wa mitungi na majiko ya gesi 260, makubwa na madogoi, kwa Chama cha Skauti Tanzania na kwamba mchango huo si gesi tu bali ishara ya imani, maadili ya pamoja, na dhamira ya kujenga mustakabali salama na wenye matumaini.Ikumbukwe pia hii ni mara ya kwanza kwa kambi za skauti kutumia gesi. Skauti walikuwa na jukumu la kutafuta kuni za kupikia kwa kambi zote zilizopiga na kwa mara ya kwanza Oryx wamebadilisha maisha ya kambi za skauti.
Kuhusu ushirikiano huo amesema Oryx Gas inaamini katika nguvu ya mabadiliko inayotokana na vijana huku akisisitiza kampuni hiyo inatambua kuwa Skauti si wapiga kambi tu,ni viongozi wa baadaye, walinzi wa mazingira, na wajumbe wa mabadiliko.
Amesisitiza kuwa kwa kuunga mkono Chama cha maskauti Tanzanaia, Oryx Gas inawekeza kwa kizazi kinachothamini nidhamu, uendelevu, na huduma kwa jamii.
Kuhusu ushirikiano Kati ya Oryx na Chama cha Skauti Tanzania amesema umezaliwa kutokana na maono ya pamoja katika kuwawezesha Skauti kutumia suluhisho safi za kupikia zinazokuza usalama, afya, na uwajibikaji wa kimazingira. Katika dunia ambapo uchaguzi wa nishati unaathiri maisha na mazingira, Oryx Gas inasimama imara kuunga mkono juhudi za elimu na uwezeshaji.
“Sababu ya Oryx Gas kudhamini kambi hiyo ilikubali kudhamini kambi hii inatokana na kulenga moja kwa moja katika dhamira yao ya kuhakikisha nishati safi inapatikana kwa urahisi, kwa usalama, na kwa manufaa ya jamii. Wanawaona Skauti si wapokeaji tu, bali ni mabalozi watakaobeba ujumbe wa kupikia kwa usafi hadi kwenye familia, shule, na jamii kote Tanzania,”amesema Wambi.
Ameongeza kambi hiyo ni darasa hai hivyo Skauti watajifunza jinsi ya kutumia gesi ya LPG kwa usalama, kuelewa faida zake, na kuwa mabalozi wa nishati safi katika maeneo yao. Pia ni jukwaa la uongozi, ushirikiano, na ubunifu, sifa ambazo Oryx Gas huzithamini sana.
“Matarajio yetu kwa Chama cha skauti itaendelea kulea raia vijana wenye uwajibikaji, maarifa, na ari ya kuchochea mabadiliko. Tunatarajia kuona Skauti wakiongoza kampeni za kupikia kwa usafi, wakiratibu maonesho ya jamii, na wakijumuisha usalama wa LPG katika mafunzo yao.
“Tunatumaini pia kuwa Chama cha Skauti Tanzania itatumia ushirikiano huu kama daraja la kuongeza wigo wa elimu, kuimarisha ushirikiano, na kuhamasisha mashirika mengine ya vijana kuiga mfano huu,”amesema Wambi.
Kwa upande wake Peter Ndomba ambaye ni Meneja wa miradi ya suluhisho la nishati safi kutoka Oryx Gas amesema kupitia kambi hiyo wataitumia kama sehemu ya kuendelea na dhamira yake ya kuendeleza vijana, kulinda mazingira, na kuhamasisha matumizi ya nishati safi ya kupikia nchini.
Amesema kuwa kambi hiyo inayotarajiwa kukutanisha mamia ya Skauti kutoka mikoa mbalimbali ya Tanzania ni jukwaa muhimu la kukuza uongozi, huduma kwa jamii, na elimu ya mazingira huku kupitia ushirikiano huo, Oryx Gas itatoa elimu kuhusu mifumo salama na bora ya kupikia kwa kutumia gesi ya kupikia.
Ndomba amesema lengo la mafunzo hayo ni kusaidia maandalizi ya chakula wakati wote wa kambi pamoja na kuhakikisha mazingira yasiyo na moshi yanayoendana na viwango vya kisasa vya nishati safi.
“Tunaamini katika kuwawezesha viongozi wa kesho kwa kuwapatia maarifa na nyenzo za maisha endelevu.Udhamini wetu kwa Skauti Tanzania unaendana na dhamira yetu ya kupanua matumizi ya nishati safi ya kupikia na kuhamasisha matumizi bora ya nishati miongoni mwa vijana na jamii.”
Ndomba amesema mbali na vifaa vya LPG, Oryx Gas pia itaendesha vipindi vya elimu kuhusu usalama, ufanisi wa nishati, na mchango wa kupikia safi katika kukabiliana na mabadiliko ya tabianchi. Juhudi hizo ni sehemu ya kampeni pana ya kuelimisha jamii kuhusu faida za LPG na kuhimiza matumizi yake katika maeneo ya mijini na vijijini.
Pia amesema ushirikiano huo ni hatua muhimu katika kujenga ushirikiano kati ya sekta mbalimbali kwa ajili ya kuwawezesha vijana na kuendeleza malengo ya nishati safi nchini Tanzania.
