Rais wa Jamhuri ya Muungano wa Tanzania Mhe. Samia Suluhu Hassan akizungumza na viongozi mbalimbali wakati akifunga Mafunzo ya Wakuu wa Mikoa pamoja na Makatibu Tawala wa Mikoa katika Chuo cha Uongozi cha Mwalimu Nyerere, Kibaha kwa Mfipa mkoani Pwani tarehe 27 Agosti, 2023.
Wakuu wa Mikoa pamoja na Makatibu Tawala wa Mikoa wakisikiliza kwa makini hotuba ya Rais wa Jamhuri ya Muungano wa Tanzania Mhe. Samia Suluhu Hassan wakati akifunga Mafunzo yao yaliyofanyika katika Chuo cha Uongozi cha Mwalimu Nyerere, Kibaha kwa Mfipa Mkoani Pwani tarehe 27 Agosti, 2023.
Rais wa Jamhuri ya Muungano wa Tanzania Mhe. Samia Suluhu Hassan akisaini Kitabu cha wageni mara baada ya kuwasili katika Chuo cha Uongozi cha Mwalimu Nyerere, Kibaha kwa Mfipa Mkoani Pwani tarehe 27 Agosti, 2023.
Rais wa Jamhuri ya Muungano wa Tanzania, Mhe. Samia Suluhu Hassan amewaagiza Wakuu wa Mikoa na Makatibu Tawala wa Mikoa kwenda kufanya kazi kuendana na mabadiliko ya dunia.
Rais Samia ametoa agizo hilo leo wakati akifunga mafunzo ya viongozi hao kwenye hafla iliyofanyika katika Chuo cha Uongozi cha Mwalimu Nyerere.
Aidha, Rais Samia amewataka viongozi hao kuwa wepesi kukabiliana na mabadiliko hayo ili kuendana na mfumo wa kidunia wa kisiasa na kiuchumi bila kusubiri maelekezo kutoka juu.
Vile vile, Rais Samia amewataka viongozi huo kujiamini na kuwa na hoja ya kutetea maamuzi wanayoyafanya kwa maslahi ya wananchi na taifa kwa ujumla kwa kuzingatia miongozo, kanuni na sheria.
Rais Samia pia amewataka kuhakikisha usalama wa vijana kwa kusimamia miradi inayowahusisha ambayo mingi hutumika kupenyeza ajenda zinazopotosha maadili ya vijana na utamaduni wa taifa.
Kwa upande mwingine, Rais Samia amewaagiza viongozi hao kuacha kupuuza wananchi hivyo wawatumikie kwa kuwahudumia na kushughulikia kero, malalamiko na mahitaji yao.
Hali kadhalika, Rais Samia amewataka watumishi serikalini katika idara tofauti kwenye ngazi za mikoa kutumia fedha za maendeleo zinazotolewa kwa maslahi ya wananchi.
