Naibu Waziri wa Wizara ya Maendeleo ya Jamii, Jinsia, Wanawake na Makundi Maalum Mhandisi Maryprisca Mahundi,akizungumza na wajumbe wa Jukwaa la Viongozi wa Uwezeshaji Wanawake Kiuchumi mkoa wa Dodoma lililofanyika leo Novemba 28, 2025 jijini Dodoma.
Naibu Katibu Mkuu wa Wizara ya Maendeleo ya Jamii, Jinsia, Wanawake na Makundi Maalum Wakili Amon Mpanju,,akizungumza wakati wa Mkutano na wajumbe wa Jukwaa la Viongozi wa Uwezeshaji Wanawake Kiuchumi mkoa wa Dodoma lililofanyika leo Novemba 28, 2025 jijini Dodoma.
Washiriki wakimsikiliza Naibu Waziri wa Wizara ya Maendeleo ya Jamii, Jinsia, Wanawake na Makundi Maalum Mhandisi Maryprisca Mahundi (hayupo pichani) wakati akizungumza na wajumbe wa Jukwaa la Viongozi wa Uwezeshaji Wanawake Kiuchumi mkoa wa Dodoma lililofanyika leo Novemba 28, 2025 jijini Dodoma.
Naibu Waziri wa Wizara ya Maendeleo ya Jamii, Jinsia, Wanawake na Makundi Maalum Mhandisi Maryprisca Mahundi,akiwa katika picha ya pamoja mara baada ya kuzungumza na wajumbe wa Jukwaa la Viongozi wa Uwezeshaji Wanawake Kiuchumi mkoa wa Dodoma lililofanyika leo Novemba 28, 2025 jijini Dodoma.
Na Jackline Minja, WMJJWM – Dodoma
Wizara ya Maendeleo ya Jamii, Jinsia, Wanawake na Makundi Maalum imesema itaendelea kushirikiana kwa karibu na Ofisi ya Mkuu wa Mkoa wa Dodoma pamoja na Jukwaa la Viongozi wa Uwezeshaji Wanawake Kiuchumi ili kuhakikisha mazingira wezeshi ya biashara yanaimarika na wanawake wanapata fursa zaidi za maendeleo bila ubaguzi.
Akizungumza na viongozi na wajumbe wa jukwaa hilo leo Novemba 28, 2025 jijini Dodoma Naibu Waziri wa wizara hiyo, Mhandisi Maryprisca Mahundi ,amesema majukwaa ya wanawake yamekuwa chachu ya mabadiliko kwa kuongeza uelewa wa masuala ya fedha, kujenga uwezo wa kiuongozi na kuwapa ujasiri wa kuanzisha pamoja na kuendeleza shughuli za kiuchumi.
“Majukwaa haya yana umuhimu mkubwa katika ustawi na maendeleo ya wanawake. Yameanzishwa ili kutoa fursa kwa wanawake kukutana, kuchochea ubunifu na ushirikiano kupitia mafunzo, midahalo na kubadilishana uzoefu,” amesema Mhe.Mahundi
Ameongeza kuwa majukwaa hayo pia yanachangia kujenga uwezo katika nyanja mbalimbali za kijamii, ikiwemo kuendeleza tunu za taifa, uzalendo na kupambana na vitendo vya ukatili wa kijinsia.
Hata hivyo,Mhe.Mahundi amesema pamoja na mafanikio yaliyopatikana, bado kunahitajika ushirikiano mkubwa zaidi kati ya sekta binafsi, taasisi za kifedha, Serikali na wadau mbalimbali ili kuhakikisha wanawake wanaendelea kupata elimu ya biashara, fursa za masoko, teknolojia bora na mitaji rafiki.
“Napenda kuwahakikishia kuwa jitihada hizi si tu zinawanufaisha wanawake peke yao, bali zinaimarisha familia, jamii na uchumi wa taifa kwa ujumla,” amesisitiza.
Kwa upande wake, Naibu Katibu Mkuu wa Wizara hiyo, Wakili Amon Mpanju, akijibu hoja zilizotolewa na baadhi ya wajumbe wa jukwaa hilo, amesema wizara itaendelea kufika katika ngazi zote ili kutatua changamoto na vikwazo vinavyowakabili wanachama wa majukwaa hayo.
Ametoa rai kwa wanawake kuhakikisha wanarejesha mikopo kwa wakati ili kutoa fursa kwa wengine kunufaika.
“Tutaangalia namna bora ya kufuatilia maeneo yenye changamoto. Tutahakikisha taasisi zote zilizotajwa zinawafikia walengwa, kwani majukwaa haya yameanzishwa kuwa lango la kutoa elimu sahihi kuhusu fursa mbalimbali. Ni muhimu viongozi kuhakikisha wanapata elimu sahihi ya mikopo,” amesema Wakili Mpanju.
