𝗪𝗔𝗧𝗔𝗡𝗭𝗔𝗡𝗜𝗔 𝗪𝗔𝗠𝗘𝗥𝗜𝗗𝗛𝗜𝗞𝗔 𝗡𝗔 𝗨𝗧𝗘𝗡𝗗𝗔𝗝𝗜 𝗞𝗔𝗭𝗜 𝗪𝗔 𝗗𝗞𝗧.𝗦𝗔𝗠𝗜𝗔-𝗗𝗞𝗧. 𝗡𝗖𝗛𝗜𝗠𝗕𝗜

-𝘼𝙢𝙨𝙝𝙪𝙠𝙪𝙧𝙪 𝘿𝙠𝙩. 𝙎𝙖𝙢𝙞𝙖 𝙠𝙬𝙖 𝙠𝙪𝙚𝙣𝙙𝙚𝙡𝙚𝙖 𝙠𝙪𝙢𝙪𝙖𝙢𝙞𝙣𝙞 𝙣𝙖 𝙠𝙪𝙢𝙩𝙚𝙪𝙖 𝙠𝙪𝙬𝙖 𝙈𝙜𝙤𝙢𝙗𝙚𝙖 𝙈𝙬𝙚𝙣𝙯𝙖.

MWANZA.

Mgombea mwenza wa Urais wa Jamhuri ya Muungano wa Tanzania kupitia Chama Cha Mapinduzi (CCM), Dkt. Emmanuel John Nchimbi, amesema kuwa atahakikisha anamsaidia Mgombea Urais wa CCM kwa nguvu, akili, maarifa na uaminifu ili ndoto na maono yake na utekelezaji wa ilani ya CCM ya mwaka 2025/30 yafanikishwe kwa mafanikio makubwa.

Akizungumza mbele ya mamia ya wananchi wa Mwanza na maeneo jirani katika mkutano wa kufunga kampeni za uchaguzi za CCM, leo tarehe 28 Oktoba 2025, Dkt. Nchimbi alisema:

“Nakushukuru sana Mgombea Urais wa Tanzania kupitia chama chetu cha CCM kwa imani yako kubwa kwangu kwa kunipendekeza kuwa msaidizi wako mkuu. Miaka minne iliyopita uliniteua kuwa Balozi wa Tanzania nchini Misri, baadae ukanipendekeza kupitia vikao vya Halmashauri Kuu ya CCM Taifa kuwa Katibu Mkuu wa CCM, na sasa umeniamini katika nafasi ya Mgombea Mwenza.”

Aliongeza kuwa ndani ya kipindi cha miaka minne, Mgombea Urais wa CCM ameonyesha imani kubwa kwake kwa kumpa nafasi muhimu ndani ya Taifa na ndani ya chama.

“Nakuhakikishia kuwa imani uliyoonesha, namna pekee ninayoweza kuilipa ni kukusaidia kwa nguvu, akili, maarifa na uaminifu ili ndoto na maono yako na utekelezaji wa ilani yetu ya CCM (2025/30) ufanyike kwa mafanikio makubwa katika miaka mitano ijayo,” alisema Dkt. Nchimbi.

Mgombea mwenza huyo pia alisema kuwa wananchi waliotembelewa katika sehemu zote wanapendekeza utekelezaji wa ilani ya uchaguzi ya mwaka 2020/25 umewaridhisha kwa kishindo.

“Watanzania katika sehemu zote tulizopita wameridhika na utekelezaji wako wa ilani ya uchaguzi ya mwaka 2020/25 kwa kishindo na wametutuma tukueleze kuwa kesho watakupa kura nyingi za ushindi wa kishindo. Hilo linatokana na utendaji kazi wako katika Serikali ya Awamia ya Sita unayoiongoza inayotokana na Chama Cha Mapinduzi (CCM),” alisema.